Қазақстан оқушылары The Earth Prize 2027 халықаралық экологиялық байқауына қатыса алады
The Earth Prize 2027 халықаралық экологиялық жобалар байқауына тіркелу басталды. Швейцарияның коммерциялық емес The Earth Foundation ұйымы өткізетін байқаудың жалпы жүлде қоры — 104 500 АҚШ доллары.
Байқау оқушылардың қоршаған ортаны қорғауға бағытталған инновациялық идеялары мен жобаларын қолдауды, экологиялық мәселелерге нақты шешімдер ұсынуға ынталандыруды көздейді.
Кімдер қатыса алады?
Байқауға Қазақстанды қоса алғанда, әлемнің түрлі елдерінен мектеп оқушылары қатыса алады.
Қатысу шарттары:
2007–2014 жылдар аралығында туған, мектепте білім алып жүрген оқушылар;
жеке немесе бес адамға дейінгі команда құрамында қатысуға болады;
бір командаға әртүрлі мектептердің оқушылары біріге алады;
қатысу толықтай тегін;
байқау онлайн форматта өтеді;
жобаларды әртүрлі тілде, соның ішінде қазақ және орыс тілдерінде ұсынуға болады.
Мұғалімдер оқушыларға жобаларын дайындауға көмектесіп, тәлімгер ретінде қолдау көрсете алады.
Қандай жобалар қабылданады?
Қатысушылар қоршаған ортаны қорғау және тұрақты даму саласындағы өзекті мәселелерге шешім ұсынуы тиіс.
Жобалардың тақырыптары:
климаттың өзгеруі және парниктік газдар шығарындыларын азайту;
қалдықтарды қайта өңдеу және пластикті пайдалануды қысқарту;
биоалуантүрлілікті сақтау;
су мен табиғи ресурстарды тиімді пайдалану;
тұрақты тұтыну және экологиялық жауапкершілік;
қоршаған ортаны қорғауда жаңа технологиялар мен инновацияларды қолдану.
Оқушылар жаңа идеяны немесе бұрын әзірленген жобасын ұсына алады. Ең бастысы — мәселенің өзектілігін негіздеу, нақты шешім ұсыну және оны жүзеге асыру мүмкіндігін көрсету.
Жеңімпаздарға қандай марапаттар беріледі?
The Earth Prize 2027 байқауының жалпы жүлде қоры — 104 500 АҚШ доллары.
Жеті өңірлік жеңімпаздың әрқайсысына экологиялық жобаларын дамыту үшін 10 000 АҚШ доллары көлемінде қаржылай қолдау қарастырылған.
Сонымен қатар қатысушылар халықаралық білім беру ресурстарын пайдаланып, зерттеу және жобалау дағдыларын дамытып, халықаралық қауымдастықпен тәжірибе алмасуға мүмкіндік алады.
Маңызды күндер
2027 жылғы 10 қаңтар — тіркелудің соңғы күні.
2027 жылғы 31 қаңтар — жобаларды тапсырудың соңғы күні.
2027 жылғы 28 мамыр — байқаудың бас жеңімпазын халықаралық онлайн рәсімде жариялау.
Қазақстан мектептері үшін қандай мүмкіндіктер бар?
The Earth Prize байқауы экологиялық білім беруді, STEM/STEAM бағыттарын, ғылыми-зерттеу және жобалық жұмыстарды мектептегі оқу үдерісімен ұштастыруға мүмкіндік береді.
Байқау әсіресе биология, география, химия, физика, информатика және жаратылыстану пәндерінің мұғалімдеріне, сондай-ақ мектептегі ғылыми үйірмелер мен зерттеу жобаларының жетекшілеріне қызықты болуы мүмкін.
Қатысу барысында оқушылар алған білімдерін нақты мәселелерді шешуге қолдануды, сыни ойлауды, зерттеу жүргізуді, командамен жұмыс істеуді және өз идеяларын халықаралық деңгейде таныстыруды үйренеді.
Тіркелу және ресми ақпарат
Байқаудың ресми сайты:
https://www.theearthprize.org/competition
Қатысу ережелері:
https://www.theearthprize.org/rules
Astana Bilim Academy Қазақстан педагогтерін, оқушыларын және білім беру ұйымдарын халықаралық білім беру мүмкіндіктері туралы ақпараттандыруды жалғастырады.
Байқауды The Earth Foundation ұйымы өткізеді. Astana Bilim Academy байқаудың ұйымдастырушысы болып табылмайды және ақпараттық мақсатта хабарлайды.
