TESOL Greece 2027 халықаралық конференциясында баяндама жасауға өтінім қабылдау ашылды
TESOL Greece ұйымының 48-ші жыл сайынғы халықаралық конференциясында баяндама жасауға өтінім қабылдау ашылды. Конференция 2027 жылғы 6–7 наурызда Афина қаласында, Грекияда өтеді. 2027 жылғы конференцияның тақырыбы — “Teach, Reach, Transform”.
TESOL Greece ағылшын тілі мұғалімдерін, тренерлерді, әдіскерлерді, зерттеушілерді және ағылшын тілін оқыту саласындағы басқа да мамандарды өздерінің кәсіби тәжірибесін, практикалық әзірлемелерін және зерттеу нәтижелерін ұсынуға шақырады.
Кім өтінім бере алады?
Байқау талаптарында тұратын елге немесе азаматтыққа қатысты шектеулер көрсетілмеген, сондықтан Қазақстаннан және басқа елдерден мұғалімдер мен зерттеушілер баяндама жасауға өтінім бере алады.
Баяндама форматтары
Қатысушылар келесі форматтардың бірін ұсына алады:
🔹 Баяндама (Talk) — 45 минут
🔹 Практикалық воркшоп (Workshop) — 45 минут
🔹 Мультимедиялық демонстрация / воркшоп
Баяндама тақырыптары конференцияның негізгі тақырыбымен қатар, ағылшын тілін оқытудың өзекті мәселелеріне арналуы мүмкін: балалармен және ересектермен жұмыс, технологияларды қолдану, мемлекеттік және жекеменшік мектептерде оқыту, жоғары білім және басқа да бағыттар.
Іріктеу қалай өтеді?
Барлық өтінімдер жасырын рецензиялау арқылы бағаланады.
Бағалау кезінде мыналар ескеріледі:
✅ конференция тақырыбына сәйкестігі;
✅ ағылшын тілі мұғалімдері мен белгілі бір педагогтер тобы үшін өзектілігі;
✅ өтінім мазмұнының анықтығы мен логикалылығы.
Ұйымдастырушылар кәсіби баяндама кітаптарды, баспаларды, авторларды, курстарды немесе емтихандарды жарнамалау үшін пайдаланылмауы тиіс екенін бөлек атап өтеді.
Спикерлер үшін қатысу шарттары
TESOL Greece конференцияға қатысу үшін спикерлерден жеке тіркеу жарнасын алмайды.
Егер баяндамаға берілген өтінім қабылданса және спикер TESOL Greece мүшесі болмаса, 50 еуро көлемінде мүшелік жарнасын төлеу қажет.
Мүшелік күнтізбелік жыл ішінде TESOL Greece іс-шараларына қатысуға, сондай-ақ ұйым журналына қол жеткізуге мүмкіндік береді.
Назар аударыңыз: жарияланған шақыруда спикерлердің жол жүруі мен тұру шығындарын қаржыландыру туралы ақпарат көрсетілмеген.
Өтінім беру мерзімі
📅 2026 жылғы 30 қазан
Өтінім TESOL Greece ұйымының ресми формасы арқылы беріледі.
Халықаралық кәсіби конференцияларға қатысу — өз педагогикалық немесе зерттеу тәжірибеңізді халықаралық қауымдастыққа таныстыруға, кәсіби кері байланыс алуға және академиялық әрі кәсіби байланыстарды кеңейтуге мүмкіндік береді.
