PISA деректерін талдау бойынша сертификат берілетін тегін онлайн-курс
Педагогтер, зерттеушілер және білім беру саласының мамандары PARIS21 Academy білім беру платформасында ұсынылған Introduction to PISA Analysis тегін онлайн-курсын өте алады.
Курс PISA халықаралық зерттеуінің деректерімен жұмыс істеуге арналған. Қатысушылар PISA деректерінің құрылымын, оларды талдауға дайындау жолдарын және алынған нәтижелерді дұрыс түсіндіру қағидаларын меңгереді.
Курста не үйренуге болады?
Курс барысында қатысушылар PISA зерттеуінің негіздерімен, деректер жиынтығының құрылымымен және оларды талдаудың негізгі қағидаларымен танысады. Айнымалылармен жұмыс істеуге, оқушылар мен мектептер туралы деректерді біріктіруге, іріктеу салмақтарына және PISA нәтижелерін талдау ерекшеліктеріне ерекше назар аударылады.
Курс материалдарында R, SPSS және STATA бағдарламаларын пайдаланып деректерді талдау мысалдары да ұсынылған.
Оқу форматы
Курстың ұзақтығы шамамен 6 сағат. Оқу толығымен онлайн форматта өтеді және материалдарды өзіңізге ыңғайлы уақытта, өз қарқыныңызбен меңгеруге болады.
Бағдарлама 8 оқу бөлімінен және тест тапсырмаларынан тұрады. Деректерді талдау бойынша алдын ала тәжірибе міндетті емес. Курс деңгейі — бастапқыдан орта деңгейге дейін.
Оқыту тілі — ағылшын тілі. Курсты сәтті аяқтағаннан кейін қатысушылар сертификат алады.
Курс педагог-зерттеушілерге, магистранттарға, докторанттарға, білім сапасын бағалау саласының мамандарына және PISA деректерін жақсырақ түсініп, оларды өз жұмысында пайдалануды үйренгісі келетіндерге пайдалы болуы мүмкін.
Қатысу тегін.
Introduction to PISA Analysis курсының ресми парақшасына өту
Astana Bilim Academy педагогтердің кәсіби дамуына арналған өзекті білім беру мүмкіндіктері, тегін курстар, халықаралық бағдарламалар мен пайдалы ресурстар туралы ақпаратпен бөлісуді жалғастырады.
